བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་དང་མང་ཚོགས་ཀྱི་འཆར་སྣང་ཞེས་པའི་སྐོར་ལ་བགྲོ་གླེང་།

བོད་ཀྱི་རྒྱལ་ཡོངས་མང་གཙོ་ཚོགས་པའི་དབུས་སྤྱི་ཁྱབ་རྒྱུན་ལས་ཁང་གི་གོ་སྒྲིག་འོག་ཕྱི་ལོ་ ༢༠༡༨ ཟླ་ ༩ ཚེས་ ༡༧ ཉིན་བཞུགས་སྒར་རྡ་རམ་ས་ལ་ཀེ་ལབ་ཧོའོ་སི་ནང་༼ བཙན་བྱོལ་བོད་མིའི་འོས་བསྔུའི་སྒྲིག་གཞི་བསྐྱར་བཅོས་དང་མང་ཚོགས་ཀྱི་འཆར་སྣང་༽ བཞེས་པའི་བརྗོད་གཞིའི་ཐོག་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་དང་ལྷན་དུ་བགྲོ་གླེང་ཞིག་ཚོགས་ཡོད་པ་དང་།  ཐོག་མ་བོད་ཀྱི་རྒྱལ་ཡོངས་མང་གཙོ་ཚོགས་པའི་དབུས་སྤྱི་ཁྱབ་ཚོགས་གཙོ་ཚེ་བརྟན་ནོར་བུ་ལགས་ནས་གཙོ་སྐྱོང་དང་སྦྲགས་བགྲོ་གླེང་གོ་སྒྲིག་བྱེད་དགོས་པའི་རྒྱུ་མཚན་གསལ་བཤད་གནང་།  ཐེངས་འདིའི་གྲོས་ཚོགས་ནང་འོས་བསྡུའི་སྒྲིག་གཞི་བསྐྱར་བཅོས་ལས་རིམ་ཡོད་པས། དེའི་ཐོག་མི་མང་གི་བསམ་ཚུལ་འདོན་དགོས་པ་དང་། དེ་སྔ་བར་དུ་འོས་བསྡུའི་སྒྲིག་གཞི་དེའི་འོག་འོས་ཤོག་འཕངས་ནས་འགྲིག་ཡོད་པ་རེད་ལ། རྙོག་གླེང་ཡོང་བ་སྒྲིག་གཞིའི་སྐྱོན་མ་ཡིན་པར། མིའི་སྐྱོན་ཡིན་སྐོར་དང་། འོས་བསྡུ་སྔོན་འགྲོ་དང་དངོས་གཞི་གཉིས་ཀ་དགོས་རྒྱུ་གལ་ཆེར་ཡིན་པ་དང་། གལ་ཏེ་འོས་བསྡུ་གཅིག་ལས་དགོས་ཀྱི་མེད་ན་བཙན་བྱོལ་བོད་མིའི་བཅའ་ཁྲིམས་དང་འོས་བསྡུའི་སྒྲིག་གཞི་ནང་སྲིད་དོན་ཚོགས་པའི་ལམ་ལུགས་ལག་བསྟར་དགོས་སྐོར་གསུངས་སོང་།

བགྲོ་གླེང་ཐོག་གཏམ་བཤད་གནང་མཁན་བོད་ཀྱི་གཞོན་ནུ་གཞོན་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་ལགས་ནས། འོས་བསྡུའི་ཐོག་མི་མང་གི་བསམ་ཚུལ་དང་མཉམ་ཞུགས་སྐྱོ་པོ་འདུག མང་གཙོའི་ནང་མི་མང་གལ་ཆེ་ཤོས་དང་དབང་ཆ་ཆེ་ཤོས་ཡིན་པས་གཙོ་བོ་མི་མང་མཉམ་ཞུགས་བྱེད་རྒྱུ་གལ་ཆེ་སྐོར་དང་། ཆོལ་ཁོངས་ནས་སྤྱི་འཐུས་འོས་འཕངས་ཏེ་འཐེན་འཁྱེར་རྙོག་གླེང་ཡོང་གི་ཡོད་ན། སྲིད་སྐྱོང་ལ་འཐེན་འཁྱེར་རྙོག་གླེང་ཡོང་མི་དགོས་པ་འདྲ་ཡིན་དུས་དེའི་ཐོག་བསམ་བློ་གཏོང་དགོས་སྐོར། ཆོལ་ཁའི་སྤྱི་འཐུས་ཡོད་ཐོག་བཙན་བྱོལ་ནང་གི་ས་གནས་མི་འབོར་ལ་དཔག་པའི་སྤྱི་འཐུས་དགོས་པ་དང་། གཞོན་ལྷན་གྱི་ངོས་ནས་སྲིད་སྤྱི་གཉིས་ཀྱི་འོས་བསྡུའི་དུས་ཚེས་ལོགས་སུ་ཡོད་ན་ཡག་པོ་ཡོད་སྐོར་གསུངས་སོང་།
དབུས་གཙང་ཆོལ་ཁའི་དབུས་རྒྱུན་ཚེ་རིང་ཐག་གཅོད་ལགས་ནས།  སྲིད་སྤྱི་གཉིས་ཀྱི་འོས་བསྡུ་སྔོན་འགྲོ་དང་དངོས་གཞི་གཉིས་ཀ་དགོས་ཀྱི་ཡོད་པ་དང་། སྲིད་སྤྱི་གཉིས་ཀྱི་འོས་བསྡུ་དུས་གཅིག་ལ་ཁེལ་དགོས་པ། མི་མང་གི་བསམ་ཚུལ་ཡར་ཕུལ་བ་གོང་རིམ་ནས་ལག་བསྟར་བྱེད་མིན་ལ་ཐེ་ཚོམ་ཡོད་སྐོར་དང་། གང་ལྟར་བསམ་ཚུལ་གང་མང་ཕུལ་དགོས་སྐོར། ཆོས་ལུགས་ཀྱི་སྤྱི་འཐུས་མི་དགོས་པ་བཟོས་ན་ཡག་པོ་ཡོད་སྐོར་ཡང་གསུངས་སོང་། དེ་བཞིན་ཁོང་གིས། ཆོལ་ཁོངས་ནས་སྤྱི་འཐུས་ཡོང་དགོས་ནའང་། འོས་དེ་མི་མང་ཚང་མས་འཕེན་དགོས་པ་དང་། གཞིས་ཆགས་ས་གནས་ཀྱི་འཐུས་མི་དང་། བོད་ཀྱི་རིག་གནས་ཆེ་བ་ཁག་གི་སྐུ་ཚབ་འཐུས་མི་འདེམས་ཐུབ་ན་ཡག་པོ་ཡོད་སྐོར་གསུངས་སོང་།    བུད་མེད་ཚོགས་པའི་ཚོགས་གཞོན་སྐལ་བཟང་གཡུ་སྒྲོན་ལགས་ནས།  འོས་བསྡུའི་སྔོན་འགྲོ་དང་དངོས་གཞི་གཉིས་ཀ་དགོས་པ་དང་། སྔོན་འགྲོ་དང་དངོས་གཞིའི་བར་སྟོང་ཟླ་བ་གསུམ་ལས་མ་མང་བ་དགོས་པ་དང་། འོས་མི་༧གོང་ས་མཆོག་གི་བཀའ་དགོངས་དང་མ་འགལ་བ་དགོས་སྐོར་སོགས་གསུངས་སོང་།    བོད་རང་བཙན་སློབ་ཕྲུག་ཚོགས་པའི་བསྟན་འཛིན་གྲགས་པ་ལགས་ནས། སྔོན་འགྲོ་དང་དངོས་གཞི་གཉིས་ཀ་ཡོད་ན་འདེམས་ཀ་ཡག་པ་རག་རྒྱུ་ཡིན་པ་དང་། འོས་བསྡུའི་འགྲོ་ལུགས་མི་མང་ནང་ཟབ་སྦྱོང་མང་པོ་སྤྲོད་ཐུབ་དགོས་པ། ང་ཚོས་གཞིས་ལུས་མི་མང་གི་ཆེད་དུ་ཡིན་ཟེར་གྱི་ཡོད་ན། བཙན་བྱོལ་ནང་གི་རྙོག་གླེང་བཤད་མ་བསྡད་པར་འཐབ་རྩོད་ཐོག་གཙོ་བོ་དམིགས་ཐུབ་མཁན་འདེམས་དགོས་སྐོར། དེ་བཞིན་དབུ་མའི་ལམ་གྱི་སྲིད་བྱུས་འཛིན་མཁན་དང་རང་བཙན་རྩོད་མཁན་གཉིས་ཀར་གོ་སྐབས་འདྲ་མཉམ་སྤྲོད་དགོས་སྐོར་གསུངས་སོང་། དེ་བཞིན་ཁོང་གིས། ས་གནས་གཞིས་ཆགས་ནས་སྐུ་ཚབ་སྤྱི་འཐུས་ཡོད་ན། རྒྱལ་ཁབ་གཞན་ལྟར་ས་གནས་སུ་དམིགས་བསལ་ལས་ཀ་བྱེད་ཀྱི་མེད་སྐོར་གསུངས་སོང་།    གཏམ་བཤད་པ་མགྲོན་འབོད་བྱས་པའི་ནང་ནས་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ཟླ་བ་བཀྲ་ཤིས་དང་མདོ་སྨད་ཆོལ་ཁའི་དབུས་རྒྱུན་དྲུང་ཆེ་བསམ་བསྟན་གཉིས་ཀྱིས་དམིགས་བསལ་གཏམ་བཤད་གང་ཡང་གནང་མེད་པ་རེད།།