ལོ་རྒྱུས།

བོད་ཀྱི་ལོ་རྒྱུས་མདོར་བསྡུས།

༄༅།   ཆེས་གནའ་སྔ་མོ་ནས་བཟུང་སྤྱིར་འཛམ་གླིང་གི་ལྗོངས་འདིར་མི་རིགས་སྣ་ཚོགས་གྲོལ་བའི་ནང་ནས་བོད་ཀྱི་འགྲོ་བ་མིའི་གྲོལ་ཚུལ་བོན་ཆོས་སོགས་ཀྱི་ལོ་རྒྱུས་ཁག་ནས་བཤད་སྲོལ་མི་འདྲ་བ་མང་ཡང་། མདོར་ན་གདོང་དམར་བོད་ཀྱི་མི་རིགས་འདི་ཆེས་སྔ་མོར་གངས་ཅན་ལྗོངས་སུ་གྲོལ་བའི་མི་རིགས་ཞིག་ཡིན་ཞིང་།
བོད་ཀྱི་ཡུལ་ནི་ཕྱོགས་ཀུན་གངས་རིས་བསྐོར་བས་རླུང་བསིལ་ལ་གཙང་བ། ཆུ་བོ་ཡན་ལག་བརྒྱད་དང་ལྡན་ཞིང། ཟས་ལ་བཅུད་ཆེ་བ། ཡུལ་ལྗོངས་མཛེས་ཤིང་སྐྱིད་པ། མི་རྣམས་བློ་གཞི་དལ་པོ་དང་སྐྱིད་པོ། ཆོས་དད་ཅན། ཕྱོགས་གང་ནས་བལྟས་ཀྱང་ངོ་མཚར་དང་དགའ་ཚོར་སྐྱེ་འོས་པ་ཞིག་ཡིན།
གངས་ཅན་བོད་རྒྱལ་ཁབ་ཀྱི་ས་ཁྱོན་ནི་སྤྱི་ལེ་གྲུ་བཞི་མ་འབུམ་ ༢༥ ཙམ་ཡིན་ཞིང༌། རྒྱ་ཁྱོན་དེ་ནི་བལ་ཡུལ་གྱི་རྒྱ་ཁྱོན་ལྔ་བཅུ་ཙམ་ཞིག་ཡིན་པ་དང༌། ཁོར་ཡུག་ནི། ཤར་དུ་རྒྱ་ནག་དང༌། མན་ཇུ། སོག་པོ། ནུབ་ཏུ་བལ་ཡུལ་དང༌། རྒྱ་གར། པ་ཀི་སི་ཐན། ཨབ་གྷ་ནི་སི་ཏན། བྱང་དུ་ཏུར་ཀི་སི་ ཏན་དང༌། ཨུ་རུ་སུ། ལྷོ་རུ་འབྲུག་དང༌། འབྲས་ལྗོངས། འབར་མ། བྷང་ལ་སྡེ་ཤི་བཅས་ཀྱི་དབུས་སུ་གནས་ཡོད། དེ་ལྟ་བུའི་རྒྱ་ཁྱོན་ཅན་གྱི་བོད་ཀྱི་རྒྱལ་ཁབ་དེ་ལ་བོད་རྒྱལ་ཐོག་མ་གཉའ་ཁྲི་བཙན་པོ་ནས་བཟུང་བོད་རྒྱལ་ཐ་མ་གླང་དར་མ་ཡན་དུ་རྒྱལ་རབས་ཞེ་གཉིས་ཀྱིས་བོད་ཀྱི་རྒྱལ་སྲིད་བསྐྱངས་པ་དང་།   དེ་རྗེས་མི་ལོ་ ༣༤༧ ཙམ་རིང་བོད་ཡུལ་མདོ་སྟོད་སྨད་དང༌། དབུས་གཙང་བཅས་པ་སིལ་བུར་འཐོར་ཏེ་ཉམས་རྒུད་ཆེར་བྱུང་ཡོད།  མཐར་རིམ་པར་ས་སྐྱའི་ཁྲི་རབས་ཀྱིས་ལོ་ ༩༦ རིང་བོད་སྤྱི་ལ་དབང་བསྒྱུར་ཞིང༌། དེ་རྗེས་ཕག་མོ་གྲུས་ཁྲི་རབས་ཀྱིས་ལོ་ ༨༦དང༌། རིན་སྤུངས་པ་ཁྲི་རབས་ནས་ལོ་༡༣༠ དང༌། སྡེ་པ་གཙང་པའི་ཁྲི་རབས་ནས་ལོ་ ༧༦ བཅས་དབང་སྒྱུར། དགའ་ལྡན་ཕོ་བྲང་གི་དུས་རབས། སྤྱི་ལོ་ ༡༦༤༢ ནས་ ༡༩༥༩བར་བོད་ཀྱི་སྲིད་དབང་བསྐྱངས།
བོད་འདི་འཛམ་གླིང་ནང་གི་ས་བབ་མཐོ་ཤོས་སུ་ཆགས་ཡོད་པ་དང། བོད་ཀྱི་ཆ་སྙོམས་ས་བབ་མཐོ་ཚད་ནི་མི་ཊར་ ༢༩༠༠ ཙམ་རེད།
ལོ་ངོ་སྟོང་ཕྲག་དུ་མའི་རིང་ལོ་རྒྱུས་ནང་བོད་རྒྱལ་ཁབ་ཀྱི་མངའ་དབང་ལ་དར་གུད་སྣ་ཚོགས་བྱུང་ཡོད་ཀྱང། སྤྱིའི་ཆ་ནས་བོད་ཀྱི་ས་ཁོངས་སུ་དབུས་གཙང་དང་། མདོ་སྟོད། མདོ་སྨད་བཅས་བོད་རིགས་གནས་ཁུལ་གྱི་ས་ཁྱོན་ཡོངས་རྫོགས་གཏོགས་པ་དང་། དེའི་སྤྱིའི་ས་ཁྱོན་ལ་ཀི་ལོ་མི་ཊར་གྲུ་བཞི་མ་ས་ཡ ༢་༥ ཡོད། དེ་ནི་བལ་ཡུལ་ཁྱོན་ཡོངས་ཀྱི་ས་ཁྱོན་ལས་ལྡབ་ལྔ་བཅུའི་ཆེ་བ་དང། ཧྥ་རན་སེའི་ས་ཁྱོན་དང་བསྡུར་ན་ལྡབ་བཞིས་ཆེ་བ་དང། འཇར་པན་གྱི་ས་ཁྱོན་དང་བསྡུར་ན་ལྡབ་བརྒྱད་ཀྱིས་ཆེ་བ་ཡོད། བོད་ས་ཡོངས་ཀྱིས་ཡུ་རོབ་སྤྱིའི་ས་ཁྱོན་གྱི་ ༡།༤ལྷག་ཟིན་གྱི་ཡོད། བོད་ཁྱོན་ཡོངས་ལ་མི་འབོར་ས་ཡ་ ༦ ལྷག་ལས་མེད། དེར་བརྟེན་བོད་ནི་མི་འབོར་ཉུང་ལ་ས་ཁྱོན་ཆེ་བའི་རྒྱལ་ཁབ་ཅིག་ཡིན་པའང་ངང་གིས་རྟོགས་ཐུབ་པ་ཞིག་རེད།
བོད་འདི་འཛམ་གླིང་ཆ་ཤས་ཁག་བདུན་ལ་བགོས་པའི་ནང་གསེས་གླིང་ཕྲན་ཨེ་ཤ་ཡའི་ནང་ཆགས་ཡོད་ཅིང། བོད་འདི་རྒྱ་ནག་གི་ནུབ་དང། རྒྱ་གར་བལ་ཡུལ། སྦར་མ། འབྲུག སྦང་ལ་སྡེ་ཤི་བཅས་ཀྱི་བྱང་། པ་ཀི་སི་ཐན་དང། ཨབ་གྷ་ནི་སི་ཐན་གྱི་ཤར། ཨུ་རུ་སུ་དང། སོག་པོ། ཤར་ཏུར་ཀི་སི་བཅས་ཀྱི་ལྷོ་ན་གནས་ཡོད།
བོད་ཀྱི་ས་མཚམས་ཁག་ནི། བྱང་ཕྱོགས་སུ་ཀུན་ལུན་རི་རྒྱུད་དང། ཨ་ཏན་སྟག་རི་བརྒྱད། རྨེ་རུ་གངས་དཀར་ཕྱོགས་ལས་རྣམ་རྒྱལ། ཨ་ལག་ཤར་བྱེ་ཐང། ཤར་ཕྱོགས་སུ་ཨ་མདོ་དཔའ་རིས་དང་། སྦ་ར་རི། ཨ་སྐད་ས་ཁུལ་ནས་མར་ཀླུ་ཆུ་ཁུག་པ་ཕྱེད་ཀ་ཙམ། ཅོ་ནིའི་ཁོངས་སུ་གཏོགས་པ་ཨུ་སྦི་རུ་པ་ཉི་ཤུ་རྩ་བཞིའི་ས་ཁུལ་ཤར་དུང་རི་མའི་རི་བརྒྱུད། བོད་ཤིང་སྒོ་མགོ་ཐོན། དར་རྩེ་མདོའི་རི་བརྒྱུད་གཡག་ལ། ཀློ་དཀར། ཀློ་ནག་གི་གཙང་ཆུ་དེད་དེ་འབྲི་ཆུ་བར་དང། ལྷོ་ཤར་དུ་འཇང་པ་ཐད་ཀྱི་ཧོར་ཆེན་མཆོད་རྟེན་དཀར་པོ། འབད་ལུང་རྫོང་འོག་མི་སྟོབས་རྒྱལ་གྱི་ས་ཁུལ་དང་། འཇའ་ཝི། རི་སྦུག་ལ། ཏུག་ལ་བར། ལྷོ་ཕྱོགས་སུ་རྒྱ་གར་དང་ས་མཚམས་ཁག་ནི་ཡོངས་ཁྱབ་ལ་དང། གངས་རི་དཀར་པོ། ཧོར་ཁ་ལ། མིག་སྟོན་དགོན་པ། ཆུ་དྭང་མོ་བར་དང། འབྲུག་ཡུལ་ས་མཚམས་ནི་ཝི་ཐང་ལ། གྲོ་མོ་ལ། གླིང་གཞི་ལ། བེད་ལ་སོགས་དང། འབྲས་ལྗོངས་ས་མཚམས་ནི་ངོས་རྗེ་ལེབ་དང། སེར་པོ་ལ། མཆོད་རྟེན་ཉི་མ་སོགས་དང། བལ་ཡུལ་ཕྱོགས་ནི་ཇོ་མོ་གླང་མའི་རེ་རྩེ་དང། འགྲམ། རྟ་ལེ་ལ། ཆུ་དཀར་ལ། ཏིར་དཀར་ལ་བཅས། ནུབ་ཕྱོགས་ཀྱི་བོད་དང་རྒྱ་གར་ས་མཚམས་ཁག་ནི་མ་ན་ལ་དང། སྲིབ་སྐྱེས་ལ། ཁྱུང་འཛིངས་ལ། ལ་ནག་ལ། ཀྲག་ཆེན་ཀྲག་ཆུང་ལ་བཅས་ཡིན།
བོད་ཀྱི་མིང་ཐོག་ཚུལ་ནི།
འཛམ་གླིང་གི་ཡང་རྩེར་གྲགས་པའི་ཁ་བ་ཅན་གྱི་ཡུལ་འདི་ལ་ནི་ཆེས་གནའ་བོའི་དུས་ནས་བོད་ཀྱི་ཡུལ་ཞེས་བྱ་ཞིང་མིང་དེ་ལྟར་འདོགས་དགོས་པའི་རྒྱུ་མཚན་ཤོད་སྲོལ་མི་འདྲ་བ་མང་པོ་ཡོད་པར། མཁས་དབང་དགེ་ཆོས་ཀྱི་༼དེབ་ཐེར་དཀར་པོའི་༽ནང་བོད་ཞེས་བྱ་བ་འདི་རྒྱུ་མཚན་ཅིའང་མེད་པའི་འདོད་རྒྱལ་ཙམ་ཡིན་པ་དང་། གཉའ་ཁྲི་སོགས་ལ་འོད་དེ་དང་སྤུ་རྒྱལ་དུ་འབོད་པས་རྒྱལ་པོའི་གདུང་རྒྱུད་ཀྱི་མཚན་ས་མིང་དུ་ཐོགས་པ། དེ་བཞིན་དུ་གནའ་བོའི་དུས་བོད་ཡུལ་འདི་གང་པོ་ན་གཡུང་དྲུང་བོན་གྱི་ཆོས་ལུགས་འབའ་ཞིག་དར་བས་བོན་གྱི་ཡུལ་ཞེས་པ་དེ་ཕྱིས་སུ་བོད་ཀྱི་ཡུལ་ཞེས་པར་འགྱུར་ཡོད་པར་བཞེད་ཡོད། དེ་ལས་སྤྱིར་མི་རིགས་ཤིག་གི་མིང་འདོད་རྒྱལ་ཙམ་ཡིན་པ་ནི་ཉུང་ཞིང་། རྒྱལ་པོའི་མཚན་གདུང་རྒྱུད་སྤྱི་མིང་དུ་ཐོགས་པ་འདིའང་ཐེ་ཚོམ་ཅུང་ཟད་ཡོད་པ་ཞིག་ཡིན་ཏེ། མངའ་མཛད་བཅུ་གཉིས་ཀྱི་སྐབས་༼ཆོས་འབྱུང་མཁས་པའི་དགའ་སྟོན༽ལས། བདུན་པ་མ་སངས་རུས་དགུས་དབང་བྱས་ཏེ། ཡུལ་གྱི་མིང་ལ་བོད་ཁམས་ཉ་དྲུག་ཟེར། ཞེས་དང་། ༼ལྡེའུ་ཆོས་འབྱུང་༽ལས་བདུན་པ་མ་སངས་རུས་དགུས་དབང་བྱས་ཏེ།ཡུལ་གྱི་མིང་ནི་བོད་ཁམས་གཡག་དྲུག་ཟེར། ཞེས་པ་དེ་བཞིན་དུ་༼ཆོས་འབྱུང་ངོ་མཚར་རྒྱ་མཚོའི་ཆུ་ཐིགས་༽དང་༼ཆོས་འབྱུང་མེ་ཏོག་སྙིང་པོ་སྦྲང་རྩིའི་བཅུད་༽སོགས་ཆོས་འབྱུང་ཀུན་དུ་བོད་ཁམས་གཡག་དྲུག་དང་བོད་ཁམས་གཡག་དྲུག་བོད་ཁམས་ཉ་དྲུག་ཅེས་གཡཱ་དྲུག་དང་། གཡང་དྲུག ཉ་དྲུག་སོགས་ཀྱི་འབོད་སྟངས་མི་འདྲ་བ་ཙམ་ལས་བོད་ཁམས་ཞེས་པ་ཆོས་འབྱུང་སོ་སོ་གཅིག་མཐུན་དུ་འདུག་པས་ན་བོད་ཅེས་པའི་འབོད་སྲོལ་འདི་གཉའ་ཁྲིའི་གོང་ནས་ཡོད་དམ་སྙམ། ཡང་༼ཏུན་ཧོང་ཡིག་རྙིང་དུ་༽ལྷ་རི་གྱང་ཐོར་གཤེགས་ནས་རི་རབ་ལྷུན་པོ་ཡང་དགུང་དུད་དུད། ཤིང་སྡོང་པོ་ཡང་བང་ཐང་ཐང་། ཆབ་ལུ་མ་ཡང་དངོ་སིལ་སིལ། གོར་ཕ་བོང་ཡང་མཉེད་ཁྲུང་ཁྲུང་གིས་ཕྱག་འཚལ་ལོ། གནམ་མཐའ་འོག་གི་རྗེ་བོ་མཛད་པའི་ཕྱིར། གནམ་གྱི་དབུས། སའི་དཀྱིལ། གླིང་གི་སྤྱི་བོ། གངས་ཀྱི་རྭ་བ། ཆུ་བོ་ཀུན་གྱི་འགོ མྱི་དཔའ་རུ་སྐྱེས། རྟ་འགྱོགས་སུ་འཕེལ་བའི་ཡུལ། བོད་གཡག་དྲུག་གི་རྗེར་གཤེགས་སོ།” ཞེས་ལ་བརྟགས་ནའང་གཉའ་ཁྲི་བཙན་པོ་མ་བྱུང་བའི་སྔ་རོལ་ནས་ཡུལ་ཡར་ལུང་འདིའི་ཕྱོགས་ན་བོད་ཅེས་འབོད་སྲོད་ཀྱི་ཡོད་པ་འདྲའོ།
གཞན་གྱི་རྒྱལ་རབས་ཁག་ནང་རྒྱལ་པོའི་མིང་ས་མིང་དུ་ཐོགས་པ་མང་ཡང་བོད་ཞེས་པའི་མིང་འདི་ནི་གཉའ་ཁྲི་བཙན་པོའི་མིང་མི་རིགས་ཀྱི་མིང་ངམ་བོད་ཀྱི་ཡུལ་མིང་དུ་ཐོགས་པ་ཞིག་ནི་མ་ཡིན་སྙམ་མོ། གཞན་སྔོན་བོན་གྱི་ཡུལ་ཞེས་པ་ལས་ཕྱིས་སུ་བོད་ཀྱི་ཡུལ་ཞེས་འབོད་པ་འདིར་བསམ་གཞིགས་ཞིག་བྱས་ཚེ། མཁས་དབང་དགེ་འདུན་ཆོས་འཕེལ་ལགས་ཀྱིས་”དེ་ནི་ངེས་པར་བཞད་གད་སྲོང་བའི་གཏམ་དུ་སྣང་མོད་ཀྱི་ཅུང་ཟད་ཅིག་བསམ་དགོས་པ་ཡིན་ཏེ། དེ་ཡང་རྗེ་གནམ་རི་སྲོང་བཙན་གྱི་ཡད་ཆོད་ན་འདི་ཡུལ་གང་པོ་ན་གཡུང་དྲུང་བོན་གྱི་ཆོས་ལུགས་འབའ་ཞིག་དར་བས། ཡ་མཚན་རྒྱུ་ཆེར་མེད་ལ། དེར་མ་ཟད་གནའི་ཐ་སྙད་དུ་རྗེས་འཇུག་ན་ད་གཉིས་ཕན་ཚུན་རྗེས་པ་ཡང་ཤིན་ཏུ་མང་སྟེ། བཙན་པོ་དང་བཙད་པོ། ཆུན་པོ་དང་ཆུད་པོ་སོགས་རེས་མོས་སུ་བྲིས་པ་བཞིན་བོན་བང་བོད་གཉིས་ཀྱང་ཕན་ཚུན་རྗེས་སྲིད་པས་སོ། སོག་ཡུལ་འགར་བོན་ལུགས་བྱེད་པ་དག་ལ་བོད་དམ་བོ་ཞེས་ཐ་སྙད་ཆགས་འདུག “ཅེས་གསུངས་པ་བཞིན་ཁོ་བོའི་བསམ་པར་ཡང་མིང་འདི་ནི་ཆོས་ལུགས་ཀྱི་མིང་ལས་ས་མིང་དུ་ཐོགས་པའམ། ཡང་ན་ས་མིང་དག་ཆོས་ལུགས་ཀྱི་མིང་དུ་ཐོགས་པ་ཞིག་ཡིན་ནམ་སྙམ་མོ། གལ་ཏེ་ཆོས་ལུགས་ཀྱི་མིང་དག་ལས་ས་མིང་དུ་ཐོགས་ཚེ་བོན་ཞེས་པ་འདིའི་གོ་དོན་ཅི་ཡིན་ཞེ་ན། ༼དེབ་ཐེར་ཀུན་གསལ་མེ་ལོང་༽ལས་”བོན་ཞེས་པ་ནི་སྟོང་པ་མ་ཡིན་པའི་དོན་ཡིན་ཞེས་དང་། གདོད་མའི་ཆོས་པ་རྣམས་ཀྱིས་རང་ཉིད་ཀྱི་ཆོས་ལུགས་དེ་སྟོང་པ་མ་ཡིན་པ་དང་། ནང་དོན་ཕུན་སུམ་ཚོགས་པོ་ཞིག་ཡོད་ཟེར་ནས་ཆོས་ལུགས་དེ་དག་བོན་ལུགས་ཞེས་མིང་བཏགས་པ་ཡིན་ནམ་སྙམ།”ཞེས་བྱུང་བ་དང་།
གཞན་མཐོ་བོད་དང་། ཐུ་སྦོའོ། སྟོད་བོད། ཏི་པད་ཞེས་པ་སོགས་ནི་བོད་ཞེས་པའི་མིང་འདི་བྱུང་རྗེས་བཏགས་པའི་མིང་ཞིག་ཡིན་ཡིན་ཞིང་། དེང་བོད་ཡུལ་འདིར་མཐོ་བོད་དུ་འབོད་པས་དེ་མི་རིགས་གཞན་གྱི་སྐད་དུ་ཟུར་ཆགས་ནས་ཐང་སོགས་ཀྱིས་བོད་ཡུལ་འདིར་ཐུ་སྦོའོ་ཞེས་འབོད་པ་དང་། དབྱིན་ཇི་སོགས་ཕྱི་རྒྱལ་གྱི་མི་རིགས་མང་པོས་ཏི་པད་ཅེས་བྱ་བ་བྱུང་བ་ཡིན་ནོ། གཞན་གངས་ཅན་དང་གངས་ལྗོངས་ཞེས་པ་སོགས་ནི་དུས་ཕྱིས་སུ་བྱུང་བའི་ཐ་སྙད་ཡིན་པ་མཁས་དབང་དགེ་འདུན་ཆོས་འཕེལ་གྱིས་གསུངས་སོ། གཞན་བོད་ཡུལ་གྱི་བྱེ་བྲག་གི་ཡུལ་ཁམས་སོ་སོའི་མིང་ལས་ཆེས་མང་བ་ནི་རུས་ཀྱི་མིང་ཡུལ་ལ་ཐོགས་པ་སྟེ་དཔེར་ན། གདོང་གི་རུས་རྒྱུད་ལས་བྱུང་བའི་ས་མིང་གཅན་ཚ་དང་། གཤེན་ཚ། རྒྱ་ཚ། ཆོས་ཤུལ། ཆུ་ཤུལ། སྤ་ཚབ་སོགས་ཡོད་པ་དང་། ཡང་ལ་ལ་ནི་རྒྱུ་མཚན་གཞན་ལ་བཏགས་པའི་མིང་ཡིན་སྟེ་དཔེར་ན། མངའ་རིས་དང་། ཨ་མདོ། ཁམས། དབུས། གཙང་སོགས་པ་ལྟབུ་ཧ་ཅང་མང་ཞིང་།

 

 

Scroll Up